हा प्रश्न अंनिसच्या कार्यकर्त्यांना अनेकदा विचारला जातो. तुम्ही एवढे कार्यक्रम करता, फिरता, मग तुम्हाला त्याचे पैसे मिळतात का ? तर लक्षात घ्या यात कोणालाही काहीही पैसे मिळत नाहीत. उलट कार्यकर्ते आनंदाने स्वतःच्या खिशातूनच खर्च करत है काम करीत असतात. पण यातून कार्यकर्त्यांना मिळणारे अन्य फायदे हे मोजता येणार नाहीत असे आहेत. ते आपण समजून घेऊया !

१) अंनिस ही एक वैचारिक चळवळ आहे. या विचारांतून आपण घडत जातो. अधिक नेटका आणि सम्यक विचार करू लागतो..

२) आपले विचार तल्लख बनतात. तर्कशुध्द भूमिका घेऊन आपले व्यक्तिमत्व बहरते.

३) आपल्या गुण कौशल्यांना वाव मिळतो. त्यातून आपल्या व्यक्ती विकासाला गती मिळते.

४) सार्वजनिक जीवनात आपण अधिक जबाबदार नागरिक म्हणून वावरतो. सामंजस्यपूर्ण व्यवहार करू लागतो.

५) प्रसंगानुरूप पद, प्रतिष्ठा, प्रसिध्दी मिळते. (पण हे आपले ध्येय नसते.)

६) या कामात असल्यामुळे आपण आपोआप व्यसन, हिंसा, बेकायदेशीर वर्तन यापासून दूर राहतो. कुटूंबात, समाजात, आपल्या कामाच्या ठिकाणी याचा प्रचंड फायदा होतो.

 

७) आपण स्वतः अंधश्रध्दांपासून मुक्त झाल्यामुळे आपले कुटुंब, मित्रपरिवार, नातेवाईक अशा अनेकांना अंधश्रध्दांमुळे होणाऱ्या शोषणापासून वाचवू लागतो.

आपण आधार देण्याच्या मार्गदर्शन करण्याच्या भूमिका निभावू लागतो,

८) हे काम करीत असतांना आपण आपले विचार निर्भयपणे मांडू लागतो, प्रश्न विचारू लागतो.

९) वरील सर्व गुण हे आपल्याला एक जबाबदार नागरिक बनवतात. म्हणून देशाची लोकशाही समृध्द करण्याचं व्यापक काम आपण करतो. या अर्थाने आपण एक कृतिशील देशभक्तीच करीत असतो. इत्यादी अनेक फायदे यातून होतात